“Judo Club 2012”nin daha bir üzvü Avropa Kubokunda medal qazandı

     Slovakiyanın Samorin şəhərində keçirilən yeniyetmə cüdoçular  arasında Avropa Kuboku turnirinə fevralın 16-da yekun vurulub.

Yarışların ikinci günündə Azərbaycan komandası daha dörd bürünc medal qazanıb. Mükafatçılar sırasında “Judo Club 2012”nin üzvü Şəid Şərifov da var. -73 kq çəki dərəcəsində qüvvəsini sınayan cüdoçumuz həlledici görüşdə litvalı idmançıya qalib gələrək bürünc medala sahib olub.

Komandamıza digər bürünc medalları Amin Mehdiyev (-81 kq), Abdullah Rəhmətov (-81 kq) və Sübhan Axundov (+90 kq) qazandırıb.

Xatırladaq ki, Avropa Kubokunun ilk günündə “Judo Club 2012”nin digər üzvü Zeyd Ələsgərov bütün rəqiblərinə qalib gələrək qızıl medala sahib olub.

Beləliklə, komandamız Samorin sınağını 2 qızıl, 2 gümüş və 6 bürünc medalla başa vurub. Millimiz bu nəticə ilə oğlanlar arasında ikinci, ümumi komanda hesabında isə dördüncü yeri tutub. 

Qeyd edək ki, 32 ölkədən 654 (408 oğlan, 246 qız) cüdoçunun iştirak etdiyi yarışda Azərbaycan komandası 16 idmançı ilə təmsil olunub.