“Judo Club 2012”nin perspektivli idmançısı Samorində çempion oldu

     Fevralın 15-də Slovakianın Samorin şəhərində cüdo üzrə yeniyetmələr arasında Avropa Kuboku turnirinə start verilib. 32 ölkədən 654 (408 oğlan, 246 qız) idmançının iştirak etdiyi yarışda Azərbaycan idmançıları da qüvvələrini sınayırlar. Komandamız ilk yarış gününü iki dəst medalla başa vurub. Mükafatçılar sırasında “Judo Club 2012”nin perspektivli cüdoçusu Zeyd Ələsgərov da var. -60 kq çəki dərəcəsində tatami üzərinə çıxan idmançımız bütün rəqiblərini üstələyərək qızıl medala layiq görülüb. Mübarizəyə 1/32 finaldan başlayan cüdoçumuz Moldova, Sloveniya, İsrail, Serbiya və Monqolustan cüdoçularına qalib gələrək finala vəsiqə qazanıb. Həlledici görüşdə polşalı idmançıya da qalib gələn Zeyd Ələsgərov fəxri kürsünün ən yüksək pilləsinə qalxıb. 

Bu, Zeyd Ələsgərovun ötən ilin noyabr ayında Salonikidə qazandığı Avropa Kubokunun qızıl medalından sonra ardıcıl ikinci ən yüksək nailiyyətdir. Bəhreyn-2024 Gimnaziada İdman Oyunlarının bürünc medalçısı bundan başqa Həzi Aslanov açıq turniri, U-18 yeniyetmələr arasında Azərbaycan birinciliyi və digər yarışların qalibi olub. 
Slovakiya sınağında millimizə digər qızıl medalı Məhəmmədəli Hüsiyev (-55 kq) qazandırıb. Komandamızın heyətində yer alan İbrahim Talıbov (-50 kq) və Rəsul Əlizadə (-55 kq) gümüş, Anar Quliyevlə (-50 kq), Əli Hümbətov (-66 kq) isə bürünc medala sahib olub. 
Millimiz bu nəticə ilə oğlanlar arasında birinci, ümumi komanda hesabında isə ikinci pillədə qərarlaşıb.