logo.png
Hidayət Heydərov Paris-2024 Yay Olimpiya Oyunlarının qalibi oldu
Cüdo üzrə yığma komandamızın üzvü Hidayət Heydərov Fransanın paytaxtı Parisdə keçirilən XXXIII Yay Olimpiya Oyunlarında komandamıza ilk qıızl medalı qazandırıb. Cüdo yarışlarının üçüncü günündə tatami üzərinə çıxan dünya və dördqat Avropa çempionumuz mübarizəyə 1/8 final mərhələsindən başlayıb. Olimpiya reytinqnində birinci pillədə qərarlaşan cüdoçumuzun ilk rəqibi Tokio-2020 Yay Olimpiya Oyunlarının bürünc mükafatçısı israilli Tohar Bitbul olub. Görüşü qələbə ilə başa vuran təmsilçimiz 1/4 finala vəsiqə qazanıb. Cüdo yığmamızın lideri növbəti mərhələlərdə kanadalı Artur Margelidon və kosovalı Akil Qyakova qalib gələrək finala vəsiqə əldə edib.
Həlledici mərhələdə cüdoçumuzun rəqibi fransalı Con Benjamin Qaba olub. Gərgin mübarizə şəraitində keçən qarşılaşmada rəqibinə qalib gələn Hidayət Heydərov Paris-2024 Yay Olimpiya Oyunlarında komandamıza ilk qızıl medalı qazandırıb. Beləliklə, Hidayət Heydərov bu il Avropa və dünya çempionluqlarının ardından Olimpiya medalını da qazanaraq Fransada Azərbaycan bayrağını yüksəklərə qaldırıb, himnimizi səsləndirib.
Bu qələbə Azərbaycan xalqının, Azərbaycan cüdosunun, eyni zamanda Hidayət Heydərovun şəxsi məşqçisi Tərlan Həsənovun qələbəsidir.
Xatırladaq ki, Azərbaycanın Əməkdar bədən tərbiyəsi və idman xadimi, “Şöhrət” ordenli Əməkdar məşqçi Tərlan Həsənov bir müddət "Judo Club 2012"nin cüdo bölməsi üzrə baş məşqçisi kimi çalışıb. Klubda çalışdığı illər ərzində bir sıra istedadlı cüdoçuların yetişməsində böyük pay sahibi olan qocaman mütəxəssisin xidmətləri "Azman Holdinq" və klub rəhbərliyi tərəfindən də qiymətləndirilib. Təsadüfi deyil ki, əfsanəvi məşqçi haqqında 2023-cü ildə Azərbaycan Cüdo Veteranları Assosiasiyasının prezidenti, Azərbaycan Cüdo Federasiyası İcraiyyə Komitəsinin üzvü, veteran ustalar arasında dünya və Avropa çempionatlarının dəfələrlə qalibi və mükafatçısı, “Judo Club 2012” idman klubunun təsisçisi Azər Əsgərovun təşəbbüsü və dəstəyi ilə "Bir cüdo əfsanəsi" adlı kitab işıq üzü görüb.
"Azman Holdinq"in tərkibinə daxil olan "Judo Club 2012" klubunun rəhbərliyi adından bu möhtəşəm qələbə münasibəti ilə Azərbaycan Cüdo Federasiyasının rəhbərliyini, Hidayət Heydərovu, onun şəxsi məşqçisi Tərlan Həsənovu və cüdo ailəsinin üzvlərini təbrik edirik!
