İlqar Müşkiyev “Judo Club 2012”nin cüdo bölməsi üzrə baş məşqçisi təyin edildi

     Paytaxtın tanınmış idman  klublarından olan “Judo Club 2012” özünün çoxşaxəli fəaliyyəti ilə Azərbaycan idmanının, xüsusən də cüdonun inkişafına öz layiqli töhfəsini verməyə çalışır. Gənc idmançıların ilbəil artan uğurları klubun fəaliyyətinin düzgün və planlı şəkildə qurulduğunu, burada Avropa, dünya çempionatlarında, hətta Olimpiya Oyunlarında ölkəmizi layiqincə təmsil edəcək gənc nəslin yetişəcəyinə əminlik yaradır. 
Əldə etdiyi nailiyyətləri, öz yetirmələrinin uğurları ilə fəxr edən klubda çalışan mütəxəssislərin peşəkarlığı da gələcəkdə yüksək məqsədlər uğrunda mübarizə aparmağa hədəflənib. 
Elə bu məqsədlə klubun məşqçilər heyətində yeni təyinat olub. Belə ki, iyulun 29-da Azərbaycan Cüdo Federasiyası (ACF) İcraiyyə Komitəsinin üzvü, Azərbaycan Cüdo Veteranları Assosiasiyasının prezidenti, usta cüdoçular arasında dünya və Avropa çempionatlarının dəfələrlə qalibi və mükafatçısı, “Judo Club 2012” İctimai Birliyinin sədri və klubun təsisçisi Azər Əsgərovun təqdimatı ilə tanınmış idmançı, dünya və Avropa çempionatlarının bürünc mükafatçısı İlqar Müşkiyev klubun cüdo bölməsi üzrə baş məşqçisi təyin edilib. 
Son vaxtlar klubda həyata keçirilən yeniliklər və təyinatlar bu cüdo ocağının daha yüksək nəticələr əldə etməsinə hesablanıb. 
İnanırıq ki, bu təyinat öz bəhrəsini verəcək və idmançılarımız növbəti illərdə də dünya və Avropa çempionatlarında uğurlu çıxışları ilə bizi sevindirəcəklər.