logo.png
“Judo Club 2012”nin üzvü Zelim Kotsoyev Olimpiya çempionu oldu
“Judo Club 2012”nin üzvü Zelim Kotsoyev Fransanın paytaxtı Parisdə keçirilən XXXIII Yay Olimpiya Oyunlarında Azərbaycana ikinci qızıl medalı qazandırıb. O, cüdo üzrə yarışlarda -100 kq çəki dərəcəsində hamıdan güclü olduğunu bir daha sübuta yetirib. Ötən il Avropa çempionu olan, bu ilin mayında dünya çempionluğunu qazanan Zelim Kotsoyev Olimpiya zirvəsinə doğru yolda polşalı Pyotr Kuçeraya, İsrail təmsilçisi Peter Palçikə, özbəkistanlı Muzaffarbek Turoboyevə qalib gələrək finala yüksəlib. O, həlledici mərhələdə ötən il Avropa çempionatının finalında məğlub etdiyi, dünya reytinqinin ikincisi gürcüstanlı İlia Sulamanidze ilə qarşılaşıb. Gərgin və maraqlı mübarizə şəraitində keçən görüşdə Zelim Kotsoyev rəqibinə qalib gələrək Olimpiya çempionu adını qazanıb. Onun qələbəsi şərəfinə Parisdə “Şam-de-Mars” arenasında Azərbaycan bayrağı qaldırılıb, Dövlət Himnimiz səsləndirilib. Bu, Azərbaycan xalqının, Azərbaycan Cüdo Federasiyasının növbəti böyük qələbəsi olmaqla yanaşı, Zelim Kotsoyevin şəxsi məşqçisi dünya çempionu Elxan Məmmədovun da uğurudur.
Hər zaman ““Judo Club 2012” cüdosevərlərin ikinci evidir və biz cüdonun inkişafı üçün bundan sonra da nə lazımdırsa, etməyə hazırıq”, - deyən Azərbaycan Cüdo Veteranları Assosiasiyasının prezidenti, Azərbaycan Cüdo Federasiyası İcraiyyə Komitəsinin üzvü, veteran ustalar arasında dünya və Avropa çempionatlarının dəfələrlə qalibi və mükafatçısı, “Judo Club 2012” idman klubunun təsisçisi Azər Əsgərov da Parisdə idmançımızın çıxışını izləyib. Cüdo yarışlarının ilk günündən idmançılarımızı dəstəkləyən Azər Əsgərov əldə olunan uğuru Azərbaycan dövlətinin, şəxsən Prezident, Milli Olimpiya Komitəsinin rəhbəri cənab İlham Əliyevin idmana və idmançılara qayğısının təntənəsi, Azərbaycanda cüdonun inkişafının parlaq göstəricisi kimi dəyərləndirib.
“Azman Holdinq”in tərkibinə daxil olan “Judo Club 2012” klubunun rəhbərliyi adından bu möhtəşəm qələbə münasibəti ilə Azərbaycan Cüdo Federasiyasının rəhbərliyini, cüdoçumuz Zelim Kotsoyevi , onun şəxsi məşqçisi Elxan Məmmədovu və cüdo ailəsinin üzvlərini təbrik edirik!
