"Judo Club 2012"nin yetirmələri fəxri kürsüdə yer aldılar

     "Sərhədçi" İdman Mərkəzində kişilər arasında Azərbaycan Cüdo Federasiyası (ACF) turunun birinci turniri keçirilib. 
ACF-in təşkilatçılığı ilə keçirilən yarışda 27 klub, cəmiyyət və idman təşkilatından olan 100-ə yaxın cüdoçu 7 çəki dərəcəsində mübarizə aparıb. 
Turnirdə iştirak edən "Judo Club 2012"nin idmançıları 1 qızıl və 1 gümüş medala sahib çıxıblar. Klubun üzvlərindən Hüseyn Allahyarov (-60 kq) bütün rəqiblərinə qalib gələrək fəxri kürsünün ən yüksək pilləsinə qalxıb. 
-66 kq çəki dərəcəsində qüvvəsini sınayan Mehdi Cəfərov isə gümüş medala layiq görülüb. 
Qeyd edək ki, yarışın keçirilməsində əsas məqsəd kişi cüdoçuların ustalığının yüksəldilməsi, rəqabət səviyyəsinin və yarış təcrübələrinin artırılmasına nail olmaqdır.