Yeniyetmə cüdoçularımız üçün növbəti sınaq

     Noyabrın 23-24-də Yunanıstanın Saloniki şəhərində yeniyetmə cüdoçular arasında Avropa Kuboku turniri keçiriləcək.

30 ölkədən 476  (307 oğlan, 169 qız) idmançının mübarizə aparacağı turnirdə Azərbaycan komandası oğlanlar arasında 8 çəki dərəcəsində 20 idmançı ilə təmsil olunacaq. 

Cüdoçularımız yarışda yeniyetmələrdən ibarət komandanın məşqçiləri Nicat Şıxəlizadə və Emin İskəndərovun rəhbərliyi altında iştirak edəcək. 

Turnirdə yığma komandamızın heyətində "Judo Club 2012"nin dörd idmançısı da qüvvəsini sınayacaq. Belə ki, iki gün davam edən yarışda klubun üzvlərindən Emil Hüseynli (-55 kq), Zeyd Ələsgərov (-60 kq), Məhəmməd Ağakişiyev və Səid Şərifov (hər ikisi -73 kq) tatami üzərinə çıxacaq. 

Xatırladaq ki, Avropa Kubokunda iştirak edəcək klubun üzvlərində üçü daha əvvəl Bəhreyn Krallığının paytaxtı Manama şəhərində keçirilən Bəhreyn-2024 Gimnaziada İdman Oyunlarının mükafatçıları sırasında yer almışdı. Belə ki, həmin turnirdə Məhəmməd Ağakişiyev qızıl, Səid Şərifov gümüş, Zeyd Ələsgərov isə bürünc medala sahib çıxmışdı. 
Cüdoçularımıza Avropa Kubokunda uğurlar arzulayırıq!